Regorta de s'ozu chi non balet prus.

In sos Comunes de su Guilcer, dae su mese coladu, est partida sa regorta de sos ozos chi non servint prus.

Comente cunferire s'ozu?

 . Lassende foras, in sa die de regorta, in dae in antis de  domo s'istèrgiu pro sa regorta cun a intro s'ozu chi at a èssere isbagantadu dae sos operadores de su COSIR.

 . Lassende foras, in sa die de regorta, in dae in antis de  domo s'ozu in ampullas de plàstica bene tupadas.

Cale casta de ozos?

 - Cussos vegetales, de tonno de màndigos collidos in ozu, cussu impreadu pro frìere, grassos de cotura.

 - Sos ozos de veturas nono.

  

Dies de regorta de s'ozu:

Lunis 28 de trìulas

Giòbia 11 de cabudanni 

Giòbia 13 de santugaine

 

Comune de Abbasanta 

Provìntzia de Aristanis.

AVISU     

Giòbia 21 de austu, in sa biblioteca comunale dae sas 4.00 de sero a sas 5,30 b'at unu laboratòriu de letura animada in limba cun s'operadora de s'ufìtziu de limba sarda.

Su laboratòriu est pro totus sos pitzinnos dae sos 6 a sos 10 annos.

Bos ispetamus in medas!!!

Norghiddo. Contributos a sos Sòtzios de sa bidda.

COMUNE DE NORGHIDDO 

Provìntzia de Aristanis 

Bandu pro contributos - annu 2013 -  a sos Sòtzios de sa bidda, iscritos a s’Albu Comunale.

 Su responsàbile de su Setore I

Faghet ischire chi:

• Sos rapresentantes legales de sos Sòtzios interessados podent presentare dimanda de finantziamentu intro de su 22 de Austu 2014, s’at a leare a cussidèriu su timbru postale cun sa data de ispeditzione. Sas dimandas ispedidas a pustis de custa data ant a èssere esclusas.
• S’ant a leare a cussidèriu ebbia sas dimandas presentadas dae sos Sòtzios iscritos a s’Albu Comunale. Sos Sòtzios chi in s’Albu sunt iscritos a prus setores, podent presentare dimanda de contributu pro unu setore ebbia. Sas dimandas devent èssere ispedidas cun racumandada A/R, pena s’esclusione, si devent impreare sos mòdulos ammaniados dae s’Amministratzione Comunale chi devent èssere curredados dae sa documentatzione rechesta. In foras dae su plicu si devent inditare su mitente, su Cumpartu e su Setore de atividade pro sa cale si dimandat su contributu. Pro su rendicontu est ammìtida sa documentatzione fiscale idònea  cun totus sos paperis chi provant sas ispesas. Sos paperis devent èssere partzidos pro manifestatziones e devent èssere relativos ebbia a su 2013. Sa documentatzione chi pertocat àteras annualidades, no at èssere leada a cussidèriu.
• Est vietadu s’impreu de documentatzione de ispesa ligada a su rendicontu comunale, pro àteras rendicontatziones de presentare a sugetos finantziadores diferentes.
• B’est su divietu de allegare a su rendicontu de su contributu comunale, finas suta de s’indicatzione autofinantziamentu, cale si siat documentatzione chi pertocat ispesas finantziadas dae àteros entes diversos dae su Comune.
• Pro èssere ammìtidos a su finantziamentu annuale si devet rendicontare s’ùrtimu contributu leadu, cun sa cuota de autofinantziamentu chi non podet èssere de mancu de su 30%, pena s’esclusione.  

 Iscadèntzia su 22 de Austu 2014.

Documentatzione cumpleta e mòdulos.  

Norghiddo. Gara de apaltu servìtziu trasportos.

COMUNE DE NORGHIDDO 

Provìntzia de Aristanis.

Est istada publicada sa gara de apaltu pro su servìtziu trasportu de sos istudentes de s’iscola materna, de s’iscola de s’òbligu cun sea in Norghiddo, de sas iscolas superiores cun seas diferentes e de su servìtziu de sustentu  a su trasportu de sos pitzinnos de s’iscola materna de Domusnovas Canales.

Sa modulìstica podet èssere iscarrigada dae su situ de su Comune o ritirada in s’ufìtziu Istrutzione de su Comune.

Iscadèntzia: h. 12.00 - 28 Austu2014

Dade cara ca s'ausèntzia de documentatzione dae sa dimanda podet èssere motivu de esclusione, francu chi sa Cummissione non permitat un'integratzione. 

Norghiddo. Rassigna tzinematogràfica.

Avisu
        

Si informat sa gente chi in s’Anfiteatru Comunale, sa Consulta de sos Zòvanos, proponet sa de bator editziones  de sa rassigna tzinematogràfica:

Cinemiamo ''Disamparados - Storie ai margini'',

bator apuntamentos chi tratant  de discriminatzione e de emarginatzione. 

Programma:

31.07.2014 – h. 21.30:''The Butler- Un maggiordomo alla Casa Bianca'', de Lee Daniels.

07.08.2014 – h. 21.00: ''Stelle sulla terra'', ghiadu dae Aamir Khan.

21.08.2014 – h. 21.30: ''Precious'', de Lee Daniels.

28.08.2014 – h. 21.30: ''Dallas Buyers Club'', regia de Jean-Marc Vallée.

Tadasune - Cuncursu de poesia in limba sarda

COMUNE DE TADASUNE

PROVÌNTZIA DE ARISTANIS

Cuncursu de poesia in limba sarda

Tadasune 2014 – Sa Pitzinnia

Cun sa punna de promòvere e torrare a iscobèrrere su balore de sa poesia in limba sarda, su Comune de Tadasune at contivizadu unu cuncursu pro su 2014; s’argumentu est sa pitzinnia.

Cun su cuncursu si diat chèrrere:

•  Fàghere a manera chi sos zòvanos incumentzent a impreare su sardu pro mantènnere fortes sas righinas de sos jajos nostros e chi fatzant de sa limba una richesa pro su tempus benidore;
• dare a sos betzos de sa bidda sa possibilidade de nos lassare pro semper, gràtzias a sas poesias in limba sarda, ammentos issoro e regordos de usàntzias antigas;

 pònnere paris sos iscritos de zòvanos e betzs pro bìdere sas diferèntzias in sa manera de iscrìere e in sos argumentos tratados;

• analizare totus sas formas dialetales de poesia e bìdere comente mètrica italiana e sarda benint postas paris, ca est una manera noa de iscrìere e diat pòdere portare sorpresas bellas puru.

Pro custa resone, diat èssere bellu a ddu fàghere ischire a prus zente possìbile.

1. Partetzipantes

Bi podent leare parte, de badas, totus sos chi iscrient in limba sarda. Tocat a respetare cantu iscritu in su bandu si nono si nche podet èssere finas esclùdidos.

2. Setziones

Su cuncursu de poesia est partzidu in tres setziones:

1. Setzione A “Pitzocheddos” (finas a sos 17 annos) chi devent iscrìere poesias, in rima o nono, in sa variante chi cherent;
2. Setzione B “Zòvanos” (dae sos 18 a sos 30 annos) chi devent iscrìere poesias, in rima o nono, in sa variante chi cherent;
3.  Setzione C “Mannos” (dae sos 31 annos in subra) devent iscrìere poesias, in rima o nono, in sa variante chi cherent;Casta de òberas amìtida

 Si nche podet mandare una poesia ebbia. Andat bene cale si siat casta de poesia in rima (tertzinas, cuartinas, sestinas, otavas, sonetos, modas, mutetos, ecc.) o in versu lìberu, chi non siat prus longa de 50 versos e non siat istada imprentada mai.

Paris a sa sa poesia cheret mandadu unu glossàriu cun sas paràulas o espressiones pagu connotas o chi non sunt de impreu fitianu

3. Sas òberas devent èssere:

•  iscritas in sardu ebbia
• mai imprentadas in libros o rivistas, internet o àteros documentos ecc
•  mai premiadas o sinnaladas in Itàlia o foras dae Itàlia in àteros cuncursos

Chie iscriet non podet fàghere imprentare sa poesia e nen mancu dda mandare a àteros cuncursos in antis de ischire su resurtadu chi at a èssere publicadu in su situ de su Comune

(www.comune.tadasuni.or.it).

4. Tema

Su tema isseberadu ocannu pro totus sas setziones est “sa pitzinnia”.

5. Comente mandare sas poesias

Sas poesias cherent mandadas (cun posta o leadas a manu) in bator còpias, paris a s’ischeda de partetzipatzione a custu indiritzu: Comune de Tadasune – Via San Michele – 09080 - TADASUNE (OR), in busta serrada; a foras si devet iscrìere “Cuncursu de poesia in limba sarda – Tadasune 2014 – Setzione ……” iscriende a cale setzione si leat parte.

Sa busta devet arribare intro e non prus a tardu de su 12 de cabudanni de su 2014

Chie nche mandat totu cun posta, si devet ammentare chi no est bàlida sa data de ispeditzione ma cussa de arribu a s’ufìtziu protocollo de su Comune de Tadasune ebbia.

6. Comente nche mandare sas bustas

In sas poesias non bi devet èssere iscritu su nùmene (cussas firmadas nche benint esclùdidas) o cale si siat àteru sinnale chi podet fàghere cumprèndere chie est s’autore.

Si nche devent mandare duas bustas, ambas serradas, una a intro de s’àtera:

una manna, cun 4 còpias de sa poesia e su glossàriu;

una pitica, cun s’ischeda de partetzipatzione (si podet agatare paris a su bandu) in ue tocat a iscrìere: nùmene e sambenadu de s’autore, tìtulu de sa poesia, indiritzu de residèntzia e domitzìliu, nùmeru de telèfono e, si si tenet, indiritzu mail. Si devet finas pònnere sa setzione e una decraratzione in ue si narat ca benint atzetadas totus sas normas e cunditizones inditadas in su bandu.

Sos inditos de comente nche mandare sas cosas sunt pretzisos. At a èssere sa segreteria organizativa chi at a abèrrere sas bustas, ddis at a pònnere unu nùmeru, at a costoire sa busta pitica e at a intregare sas poesias a sa cummissione.

Sas poesias no ant a èssere torradas a su mere e su Comune, una die, ddas at a pòdere finas imprentare. Una còpia de onniuna at a èssere finas posta a disponimentu in sa biblioteca comunale de Tadasune.

Totus sas poesias ant a èssere postas finas in su situ de su Comune.

Si b’at copyright, devet èssere de s’autore chi leat parte a su cuncursu.

7. Comente benint dados sos zudìtzios

Su chi detzidit sa cummissione non podet èssere tirriadu. Custa at a isseberare unu binchidore pro onni setzione e at a pòdere finas dare una o prus mentziones

8. Cummissione

Sa cummissione chi at a dèvere balutare sas poesias arribadas, at a èssere formada dae persones cun esperièntzia e cumpetentes in campu culturale e linguìsticu.

Sos nùmenes de sos cumponentes de sa cummissione ant a èssere fatos a ischire a pustis de su 12 de cabidanni e s’ant a pòdere lèzere finas in su situ de su Comune.

9. Premiatzione e prèmios

Totus sos iscritores sunt dae oe cumbidados a sa festa pro sa premiatzione chi s’at a fàghere sàbadu, su 13 de nadale 2014, a sa ses de sero, in sa domo Pinna, Cursu Imperu, Tadasune (OR).

Sa die ant a èssere lèzidas a boghe arta sas poesias prus bellas e, a pustis, ant a èssere premiados sos binchidores.

Si un’iscritore tenet isturbu e non podet leare parte a sa premiatzione, a nde retirare su prèmiu podet mandare àtere, cun dèlega.

Sos binchidores ant a èssere premiados cun bonos de ispendere gasi:

Binchidore setzione A - € 100,00 (pro comporare libros, CD, DVD, letore digitale pro mùsica);

Binchidore setzione B - € 200,00 (pro comporare letore digitale pro mùsica, tablet, ebook);

Binchidore setzione C - € 300,00 (de ispèndere in sas termas de Fordongianus).

Sa festa de premiatzione at a pòdere èssere trantzida in casu de impedimentu o problemas. In custu casu at a èssere faina de s’ufìtziu su de ddu fàghere ischire a sos interessados e a nche ddu pònnere finas in su situ internet.

A su nessi deghe dies in antis de sa premiatzione totus sos iscritores ant a èssere avisados pro telèfono o cun lìtera.

10. Informatziones

Ufìtziu Cultura Comune de Tadasuni, via San Michele, 09080 Tadasune – tel. 078550047 - fax 078550176 –

email: info@comune.tadasuni.or.it -

pec: protocollo@pec.comune.tadasuni.or.it

Responsàbile de su protzedimentu Dott.ssa Antonella Deiana

Su bandu e s’ischeda pro bi leare parte si nche podent iscarrigare dae su situ: http://www.comune.tadasuni.or.it/.

Tadasune, 25.06.2014

Sa responsàbile de su servìtziu

F.to Antonella Deiana

Atividade ufìtziu limba sarda, annualidade 2011, operativa in su 2014

Si faghet ischire chi at torradu a abèrrere s'ufìtziu limba sarda.
Su servìtziu est istadu dadu in apaltu a sa sotziedade cooperativa "L'Altra Cultura".
Pro cale si siat informatzione sos operadores sunt a disponimentu in sos ufìtzios de:

• Abbasanta
• Aidumajore
• Boroneddu
• Ilartzi
• Norghiddo
• Tadasune 

 Dies e oràrios de abertura

Abbasanta: giòbia sero, dae sas 4,00 a sas 6,00
Aidumajore:  martis dae sas 8,00 a sas 11,00 (s'ufìtziu est abertu una chida emmo e una nono)
Boroneddu: giòbia manzanu dae sas 11,30 a sas 13,30
Ilartzi: martis dae sas 11,00 a sas 14,00  (sa sea de s'ufìtziu est in Norghiddo)
Norghiddo: chenàbura dae sas 11,00 a sa 14,00
Tadasune: chenàbura dae sas 8,00 a sas 11,00